Act 15 | AEY | STEP | Odocob dana leih Judiadec Antiok limeig wawaga meleec cotogail iwalaadeig maadein, “Age Mosesna loo jena toodu odi dewenega cagu qee qufeig Anut age cahahaadecnu ihoc qee,” adein.

Acts 15

Tamanec uqana cegulec ben Jerusalem ono calen

1 Odocob dana leih Judiadec Antiok limeig wawaga meleec cotogail iwalaadeig maadein, “Age Mosesna loo jena toodu odi dewenega cagu qee qufeig Anut age cahahaadecnu ihoc qee,” adein. 2 Eu odi odocobil Banabas Polca gami fee dadanein. Eunu Banabas Polca dana leih Antiokdecca age Jerusalem ono belimeig je fee dadanec ein eundec aposel tamanec agena matuca maadoqagannu madein.

3 Odocob tamanec suladeceb jic cocobi belein. Odocob saen age Finisia Sameriaca ono li calimeig age Juda dana qee Anutnu wawaga meleennu saadein. Odocob wawaga meleec cotogail cunug je eu dah mimeig age ceelein. 4 Saen age Jerusalem li calecebil tamanecca, aposelca, tamanec agena matumatuca alalagadecebil age cabi cunug Anut uqa age gami cabi oinnu saadein. 5 Euqa dana wawaga meleec age Farisi agena amnadec cajimeig madein, “Age dewenega cagu qocnu Mosesna loo je toodu odocnuca age odoc bahic odoqagan,” ein. ^{▼▼(15.5)Age je Aposel 11.2na nijia eu feiga.}

6 Odocob aposel dana matuca age je eu tutuc mudoqagannu cegulein. 7 Odimeig saen cecelac bahic togodumeig Pita cajimei maaden, “O cotiel, ija Juda dana qee me je maadecnu weleca Anut age gemonadec ija nesili ehiten. Eunu Juda dana qee age dah mecebil wawaga meleigiannu eu dogina. 8 Odocob Anut uqa dana wawaga meleecnu dona eu uqa Juda dana qee eundec ageha uqanu wawaga meleecnu ihoc eu ihacadimei uqa Kis Gun egeca suldocob nenwe eu odi uqa ageca ha suldocob nen. 9 Odocob uqa egeca ageca eu gug fil qee odel. Euqa age uqanu wawaga meleen. Odimei age wawaga meleecna age wawaga soidon. 10 Eunu qila age eetanu Anut temdogina? Age culumen i ege jajanigeil egeca gahidocnu ihoc qee eu malogom adecwe qee. 11 Anut uqa Jisas Tibud uqana uum igecna cahahaadigianwe uqa odi egeha Jisas Tibud uqana uum igecna cahahagigian eunu wawige meleena,” aden.

12 Odocob dana am euna cunug tiliein. Age Banabas Polca ale Anut Juda dana qee gemona ebenelana kobolkobol gagaca odon eunu saadesinnu dah mein. 13 Ale je madi hedocobil Jems co suli u maaden, “O cotiel, ija dah miteiga! 14 Saimon uqa wele sildigia, Anut hahawan Juda dana qee eundec age cahahaadecnu limei gemonadec leih uqanagul bilituqagannu cedaden. 15 Odocob je hahun madec dana agena jaqec je ica caca bahic madena odi:

16 ‘Tibud madena, “I hedocob hibna dana cajaca saen euna bileginaca Juda dana qee age ijanagul biliteginaca age cunug Tibud walutuqagannu ija ceselimig Dewidna jo qahen eu haun sulecemin cajigian.
Jo teful qahaden eundec ija cisindugen,” ena.
(Amos 9.11-12)

18 Tibud eu odi madena,
uqa wele bahic je i edi madeceb hu li madeceb doin,’ ena,” aden.
19 “Eunu ijana cisdoc eu odi. Juda dana qee age Anutca falicdogina eu ege culumen i qee adoqaun. 20 Euqa jajanagail saennadec dana age Mosesna loo je taun ben cunugna Juda agena cuha jona cuha deel cunugna ha sanijimeig me je maadecebil doqona. Eunu ege jaqec je oso sulduadoum. Je odi maadoum, ‘Age kadan tibud ihanecnadec sab eundec cain jowain. Sab eu gegehinca. Dana uqa caja qee oc cajaca cain nijuwasin. [Dool benega coldocobil cal men eu cain jowain.] Ceteh golacha cain jowain,’ adoum,” aden. ^{▼▼(15.20-21)Juda age Isrel hatuna himec qee bilelein. Weleca age budu beladimeig hatu cunug ono nijein euna ilag bilein. Odocob agena cuha jo eu taun cunugna bilein euna tawein. Age Aposel 2.5-11 feiga. Eunu dana cajaca age taun euna bilein age Mosesna loo jenu je mati dah mi hedoin.}

Age Kristen sihul fil agena je oso sulduadein

22 Odocob aposelca, tamanec matumatuca, tamanec cunugca age je madi cagoin. Odocob age dana leih gemonadec Judas Basabas dogina uqaca Sailasca nesili cedalimeig ale Pol Banabasca gami Antiok suladecebil beloqagan ein. Judas Sailasca ale wawaga meleec cotolail aquniadec dana. 23 Jaqec je i edi sulduadein:

“Ege, aposelca tamanec matuca, age Juda dana qee, age ege wawige meleec cotigeil Antiokca, Siria hatuca, Silisia hatu nagca bilegina, egena feele adec je sulduquna,” adein.

“Ege dana leih egena amnadec belimeig age je ihulahal maadecebil wawaga me qee men odi dah mom. Euqa ege age odi odocnu qee maadolom.

25 Eunu ege ceguli togodumeb dana sos lecis nesili cedalimeb ageca suladecnu ege cunug cois oqan. Ale egena danah lecis Banabas Polca gami loqagan. 26 Dana i ale Jisas Krais Tibud ijannu cabi oosin dana age aqalecebil cal mowasa odoin. 27 Eunu ege Judas Sailasca ale conolagulna je jaqoqa i edi maadowasan sulaloqona. 28 Kis Gun egeca culumen haunhaun oso qee adoqaun qa gadac i himec wooldocnu ihoc qee adoqona eunu wawige osol moqan. 29 Age kadan tibud ihanecnadec sab cain jowain. Ceteh golacca eu cain jowain. Dool benega coldocobil cal men eu cain jowain. Dana uqa caja qee oc cajaca cain nijuwasin. Age ceteteh i ilag qee odifeig eu age me odoqagan. Odio,” adein. 30 Odimeig age dana sos suladecebil Antiok belein. Ono age dana wawaga meleecca cunug gabanadimeig jaqec je eu adein. 31 Odocobil age jaqec je eu sanijimeig age hulunuga cehec je eunu celeboein. 32 Judas Sailasca, ale je hahun madec dana, saen cecelac bahic wawaga meleec cotogail je mati bahic hulunuga cehi maadecebil agena wawaga meleec gagadic men. 33 Odimeig hibna ono saen leih age gami bilimeig Antiok tamanec dana age dana sos sulalein age malolca ceseli sulalecebil belesin. [Euqa Sailas uqana cisdoc ibuldumei Antiok ono nijigiannu maden.]

35 Odocob Banabas Polca Antiok ono nag odi bilesin. Ale dana matica osoben tamanec ono Tibudna me je iwaladein.

Pol Banabasca fee dadanimesi filigandosin

36 Odocob deel leih hedocob Pol Banabas madon, “Hoga, cotileil taun ben cunugna bilegina ele Tibudna me je maadoh eu haun ceseli belimeu age adi cabi ogina eu fewan,” don. 37 Odocob Banabas uqa Jon age Mak ein age gami beloqagannu cisdon. 38 Euqa wele uqa age gami bilimeig beli me je iwaladec cabi qee oloi, odimei uqa Pamfilia hatu nagna culali Jerusalem ono ceseli nuen. Eunu Pol uqa ehudi nuecnu culen. 39 Odocob aledodoc fee dadan bahic imesi filfil filigandu belesin. Banabas Mak ehudeceb wagna Saipras nuina belesin. 40 Euqa Pol Sailas nesili ehuden. Bebelesin wawaga meleec cotolail age Tibudna waug qoc cofaaleb cobowasannu Anut ebenna mein. 41 Odimei uqa Siriaca Silisiaca hatu eu gemogemo nuen. Nunuei tamanec cesuladi maadeceb agena wawaga meleec gagadic men.